በዚህ ሳምንት እንኳን
እባካችሁ ተውን
የኢትዮጵያዊነት ክብራችን
ተነክቶ
የሥላሴ ህንፃ ፈርሶ
ተንኮታክቶ
እምነት በሌላቸው በአህዛብ
ተዋርደን
እባካችሁ ተውን እናፍስ እንባችን
አልቅሰን ይውጣልን መከራ ሲቃችን
እንዘን እንተክዝ ለወገኖቻችን
አለምም ይመልከት ይህንን ግፋችን
በአደባባይ ወጥተን እንባ ማፍሰሳችን
እህት ወንድሞቹን ሁሉንም
ሰው ሊያደርግ
ምስኪኗን እናቱን ከረሃብ
ሊታደግ
ጥቂት ስንቅ ሊያመጣ
ከቤት እንደወጣ
በዚያው ቀርቷልና ከቀየው
ሳይመጣ
እባካችሁ ተውን እርማችንን እናውጣ
በሊብያ ሜዳ በጥይት ተቆልተው
በባህር ዳርቻ እንደ በግም ታርደው
ሰማዕታት ለሆኑት በክርስትናቸው
እባካችሁ ተውን እርማችን እናውጣ
የሚያሰጡንንም በረከት አንጣ
ድንገት ይኖር ይሆን የሚፈርድባቸው
ከቀየ ከመንደር ከሀገር
ስለወጡ
እንጀራን ለመጥገብ እጅ
ስለሰጡ
ኢትዮጵያዊነትን ጠልተውት
አይደለም
ያደጉበትን ወግ ንቀውም
አይሆንም
ወገናቸውንም አቃለው
አይደለም
ቢቸግራቸው ነው ማጣፊያው
ሲያጥራቸው
ደሀ ተበድሎ ፍርድ ቢጓደል
ነው
አስተዋይ ሰው ጠፍቶ
ከኢትዮጵያ ምድር
ሁሉን አንድ አድርጎ
አፍቅሮ የሚያፋቅር
መንጋውንም መርቶ ህዝቡን
የሚያሻግር
እግዚአብሔርን ፈርቶ
ሰውን የሚያከብር
ከቤትም ሲወጡ ተስፋውን ሰንቀው
ልክ የዛሬ ዓመት እንመጣለን ብለው
መስዋዕት አቅርበው ስዕለትን ተስለው
ሀገር ለመመለስ ነበረ ቃል ገብተው
አሁን አስከበሩን በእምነታቸው
ፀንተው
ሰማዕትም ሆኑ ማዕተብን
አስረው
የቅዱስ ጊዮርጊስን ፋና
ተከትለው
ምንም እንኳን ብናዝን በሰብአዊነት
ሙሾ ብናወጣ ብንደቃ ደረት
ግን ተደስተናል በሰሩት ጀግንነት
No comments:
Post a Comment