ጊዜ የሰጠው ቅል ዓለቱን
ሠበረ
የዓለቱን ልጆች እጅና
እግር አሰረ
ርስታችን ሁሉ ገብቶ
መዘበረ
እንጀራ እንጠግብ ዘንድ
ብንሰጥ እጃችን
ባሪያዎች አረጉን በገዛ ብራችን
የገዛ ውኀችን በብራችን ጠጣን
እንጨታችንንም በዋጋ ሸጡልን
የተናቀ አሕዛብ ማተብ
የሌላቸው
በሚዛን ላይ ያሉ ጥቃቅን
ትቢያዎች
በገንቦ ውስጥ ያሉ ጥቂት
ጠብታዎች
ኑሮን ልናቀና ብንመጣ ሀገራቸው
ቅርጫት ተሸክመን ብንሄድ ቀያቸው
ባሪያዎች አይለው ከለዳውያን ገነው
ደመ ከልብ አረጉን ደማችን አፍሰው
ከምድረ በዳ ሰይፍ ሐሩር
የተነሳ
ቁርበታችን ጠቁሮ መልካችን
ተረሳ
ኢትዮጵያዊ እንደሆን
ጠላትም ረሳ
ደማችንን ሊያፈስ ብረቱን
አነሳ
በገዛ ምድራችን በአህጉራችን
በአደባባይ ተጣልን በእሳት ተቃጠልን
በባህር ዳርቻ እንደ በጎች ታረድን
በግፍ ተደበደብን በጥይት ተገደልን
ክብራችንን ጥለን ስደት
ብንወጣ
ሕይወታችን ሸጠን ንዋይ
ልናመጣ
ወገን እንደሌለው ተዘባበቱብን
መሳለቂ አድርገው አፍም
ከፈቱብን
ሀገር እንደሌለው ባይተዋር
አረጉን
አሁን ግን አቤቱ አስብ የሆነብን
ልባችን ታመመ አይናችን ፈዘዘ
ንቀትንም ጠገብን እጅግም ተዋረድን
በየአደባባዩ መጠቋቀሚያ ሆን
እባክህ ፈጣሪ ወደ አንተ መልሰን
እኛም በንስሐ እንመለሳለን
ቀሪ ዘመናችን እንደቀደሞው አድስ
ስድባችንንም እይ እንባችንም አብስ
ዳግም ተመልሰን እንበል ቅዱስ ቅዱስ
አንተ ነህ ታዳጊ ለሁሉ የምትደርስ
No comments:
Post a Comment